Jamita Evangelium Minggu Sexagesima, 12 Februari 2023: “Tua ni Halak na Daulat Marroha” (Psalmen 119: 1-8)

Ginurithon di Pdt. Dr. Robinson Butarbutar, Ephorus HKBP

Hamu angka Dongan hinaholongan,

Baca Juga:

• Jelang SG HKBP ke-67, Ini Harapan Hotman Nainggolan
• Tema Natal BUK Kota Tanjungbalai 2024: 'Marilah Sekarang Kita Pergi Ke Betlehem'

Di ari Minggu 29 Januari 2023 na salpu nunga dipanghulingi Debata hita marhite Keteladanan ni hatoguon ni haporseaon ni si Job, sahalak na porsea jala na daulat, na atik pe daulat tong mangadopi parungkilon bolon marrumangkon agoan arta, angka ianakkon, nang manaon sahit na pinatupa ni sibolis ni loas ni Debata, alai na tong dipatau Debata mangadopi parungkilon i. Ndang adong mardosa ibana uju mangadopi parungkilon i. Baliksa, tarbahen ibana manghatindangkon habisuhon dohot hagogoon ni Debata songon alusna tu surasura ni donganna na mandok na umbahen na manaon ibana siala ni hasalaanna do, jala ala ni i ringkot ibana mangongku sala, anggiat marpamuati roha ni Debata mida ibana.

Baca Juga:

• Minggu Kasih, Wakapolres Tanjungbalai Berikan Bantuan kepada Jemaat HKBP Pasar Baru
• Ketua PWKI Ajak Wanita Kristen Berdampak Untuk Kemuliaan Tuhan

Marhite Evangelium di minggu na salpu i, ditogihon do hita marsiajar sian si Job na atik pe manaon alai ndang olo manalahon manang ise, donganna jolma nang Debata. I ma sada hatauon ni halak na daulat marraoha dohot marparange na sasintongna, i ma na tong porsea di hataNa na mandok na martua do na daulat roha, nang uju manaon sitaonon na so taradopi pamatang on.

Asa, na daulat roha i ma na tong togu, satia mangoloi, mangaradoti dohot mamarangehon lomo ni roha/patik ni Debata nang uju manaon. Laos hadaulatonna i do na patau ibana mangadopi sitaonon i. Aut sugari ndang na daulat marroha, siradoti dohot siulahon lomo ni rohaNa/patikNa na tutu ibana nunga salahononna Debata na mangaloas masa parungkilon bolon na masa tu ibana. Aut sugari ndang songon i nunga oloanna soara ni donganna saripe na manosoi ibana asa manalohon jala manadingkon Debata na mangaloas ibana manaon songon i. I do na disoarahon buku Habisuhon na umpudi, Job.

Di bagasan sadari on, minggu Sexagesima on jala di bulan Pebruari 2023 na di hita HKBP ditiroi hataNa taringot tu ngolu na badia/na daulat, Kekudusan Hidup, ditogihon hataNa na di Psalmen 119: 1-8 do hita ganup asa manghaposi haporseaon na togu na sinoarahon ni buku Habisuhon na tumua, i ma Psalmen 119: 1-8 on na tonana tu hita ndang be apala manjouhontu hita asa marroha dohot marpangalaho na daulat ma hita marhite na marhangoluan ngolu ni naung pinatigor ni Debata di bagasan Jesus Kristus, i ma na sai tagoari marhangoluan ngolu na imbaru tinuturan dohot pinargogoan ni Tondi Porbadia na mian di bagasan dirinta marsadasada. Nang pe mansai ringkot do i taratarratai, mamarsiajari dohot mangulahon patik, mangalului Ibana sian nasa roha, unang gabe na maralo tusi taula, mangulahon hageduhon. Ndang apala i, ai nunga tibu i taboto mamungka sian adong Hakristenon Batak, mamungka sian sihadakdanahonta. Nunga sai taajarhon i di jabunta be tu angka ianakkonta, di program-program na adong di huria, mamungka sian pangajarion Sikkola Minggu, punguan remaja, Angkat Sidi nang angka jamita.

Alai tinonahon ni hataNa na sian Psalmen 119: 1-8 tu hita sadarion i ma na mangondolhon tua ni na marroha dohot marparange na daulat, na mangaradoti dohot mamarangehon hataNa/patikNa/lomo ni rohaNa, i ma panghorhon na denggan sitatapon dohot sidaion ni na parroha dohot parparange na daulat. Siala ni i do panghuling ni jamita sadarion songon on: “Tua ni na marroha na daulat” na marojahan tu Psalmen 119: 6, “Dung i ndang tagamon tarurak ahu molo sai huparateatehon sude angka tonami.” Angka na martua do na daulat marroha. Alai dia ma na apala diondolhon marhite sian Psalmen 119: 1-8 on, na mansai ringkot di hita angka ruas dohot pangula ni HKBP di partingkian nuaeng nang di ariari na ro.

Adong dua na sinoarahon ni topik, ‘Tua ni na marroha na daulat’ i. Naparjolo, i ma sian ujung, i ma ‘na marroha na daulat.’

‘Marroha na daulat’ do diondolhon, ndang apala ‘marpangalaho na daulat’ songon na disoarahon Psalmen 119: 1 i, ala parjolo do di roha disangkapi dohot dipingkiri jolma i angka na naeng ulahonon dohot parangehononna. Molo ndang daulat roha i ndang tarbahen jolma i mangulahon/marparange na denggan. Di pangajarionna tu angka siseanna didok Jesus do na ndang na masuk sian pamangan ni jolma na mambahen ramun jolma i, alai na ruar sian rohana do. Ala ni i do parjolo situtu hadaulaton ni na marroha diondolhon, ndang apala panghorhonna, i ma hadaulaton ni na marparange. Ala ni i do molo adong na patupa ulaon na jahat, di uhum/pengadilan, na disangkapi di roha ni sipatupa ulaon na jahat i do na disulingkiti panguhum. Di roha do disangkapi ulaon na jahat i, manang ndang. Molo di rohana, umborat do uhum tu sibahen na jahat i, sian na mangulahon hajahaton so jolo disangkapi di rohana. Parbue ni na disangakapi roha do parange i. Molo daulat rohana, daulat ma parangena. Molo, jahat do disangkapi rohana, ba jahat ma na pinarangehonna. I do umbahen na ditangiangkon par-Psalmen 51: 12 do songon on: “Tompa ma roha na ias di bagasan ahu ale Debata.”

Napaduahon, i ma, ‘Tua,’ tua ni na marroha na daulat. I ma tu na marroha na daulat. Apala on do ondolan ni tona ni hata ni Debata di Psalmen 119: 1-8 i. Na digoari na gabe tua di Psalmen 119: 1-8 on ndang apala angka pasupasu arta, sinadongan, hagabean nang angka na mardomu tusi, na di partingkianta nuaeng di sandok portibion jotjot dipangke gabe suhatsuhat ni ngolu ni jolma na berhasil. Alai ndang apala i ia na diondolhon di jamitanta on. Dia do? I ma tua na “Dung i, ndang tagamon tarurak ahu, molo sai huparaateatehon sude angka tonami.” Ndang tagamon tarurak.

I do tua ni na daulat marroha. I do tua ni na manangihon, mangguruhon, mamparorahon/mamparateatehon, na manuanhon di rohana na hinalomohon ni Debata, i ma angka patikNa i, huhut na mamparangehonsa di ngoluna: Ndang tagamon tarurak.

Mansai ringkot do on gabe isi/tona ni barita na uli di partingkianta nuaeng tu hita angka ruas ni HKBP naung pinatigor ni Debata. Di minggu na salpu dipangido tu hita asa ‘Gabe Siula Hata i.” Nuaeng tu na umbagas dipangido tu hita i ma rohanta i ingkon ma daulat. Ingkon ma gabe parroha na daulat hita on, asa tarbahen hita marhangoluan na so hasurahan sahat tu ajal ni ngolunta.

Boasa ma apala tua na songon i dipaandar hata ni Tuhan i tu hita di partingkianta nuaeng? Atik na naung pamaterialistishu hita on nang di Hakristenonta, gabe panghorhonna ndang be daulat rohanta, ndang be daulat di ujungna parangenta. Nunga gabe tubu permissivisme, i ma sada pikkiran na manosoi hita patupa nang na maralo tu lomo ni roha ni Tuhanta. Ndang holan di sundut na tumua masa na songon on, alai dohot do di sundut na umposo. Ala ni i ma migor ditahi angka sundut na umposo hatophatop manang humatop ma mamora dirina, tung beha pe dalan sahat tusi. Laos panghorhonna, rohana pe ndang daulat.

Atik na so hadaulaton ni rohanta i be na tatuju, gabe ndang haiason ni rohanta be na tapangido sipatupaon ni Tuhanta i di hita, asa ruar sian rohanta i angka na jahat: “Ai sian bagasan, sian roha ni jolma i do ro pingkiran na jahat, parmainanon, panangkoon, pamunuon, pangalangkupon, pangahution, hajahaton, pangansion, pargadombuson, pangorngangon, panginsahion, ginjang dohot neang ni roha” (Mark 7: 21-22). Ndang mabaor be sian hita hita (Yoh 7: 38). Ala ni i do di Rom 12: 2 dipangido tu hita angka naung pinatigor ni Tuhanta asa paimbaru rohanta/pingkiranta (Gorik: anakainosei noos). Jala di Epesus 4: 23, “Alai paimbaru hamu ma dirimuna di di bagasan tondi ni rohamuna (Gorik: pneumati tou noos.) dipangido umbagas sipaimbaruonta marhite huaso ni Tondi Porbadia i ‘tondi ni rohanta/pingkiranta’. Ai disi do disangkapi na denggan, jala disi do tong disangkapi na so denggan.

Dung songon i torbangna Hakristenon Batak i, 161 taon, nunga tingkina tasulingkiti dirinta, manang naung daulat rohanta dung dipatigor Debata hita. Dison do barita nauli i: Ndang tarbahen hita patupa hadaulaaton ni rohanta i. Tuhanta Jesus do na tuk patupa i. Dipargogoi Debata ma hita mangulahonsa. Amen